Во рамките на напорите за дерусификација и раскрстување со минатото и со влијанието од Москва, Украина го заменува грбот на Советскиот сојуз на штитот на Споменикот на Татковината во центарот на Киев, објави Гардијан.

Работници утринава почнаа да го поставуваат трозабецот на местото на отстранетиот симбол на СССР кој што бил поставен уште во 1981 година, откако вчера силниот ветар ги спречи да работат на споменикот висок 62 метри. Инаку целиот објект, споменикот со постаментот е висок 102 метри.

Скулпторот на икраинскиот трозабец Алексиј Пеграменшчик, мавтајќи со украинското знаме извикуваше: „Слава на Украина!, Слава на хероите!, Слава на оружените сили!”.

Поранешниот украински министер за култура Олександар Ткаченко пак се огласи на Телеграм.

-И тоа се случи. Украинскиот трозабец е на своето место. Тоа беше сложен, одговорен, историски проект. Им благодарам на сите кои ова го реализираа – на донаторите, проектнтите, градежниците, вајарите, вработените во Воениот музеј, на сите кои ги поддржуваа и навиваа за овие промени, напиша Ткаченко.

Украинците се надеваат дека трозабецот целосно ќе биде поставен до Денот на независноста, 24 Август, а според најавите, грбот на СССР ќе се чува во музеј.

Споменикот на Татковината е највисокиот споменик во Украина. Идејата за замена на симболите се појави уште кога сепаратистите кои ја поддржуваат Русија ја презедоа власта во источна Украина, но поради големите трошоци и стравот дека можеби ќе се загрози стабилноста на споменикот, плановите беа одложени.