Управата за хидрометеоролошки работи (УХМР) издаде „жолто предупредување“ за нестабилно време утре и задутре, со очекуван пороен дожд, грмотевици, засилен ветер и изолирана појава на град.

Според УХМР, под влијание на влажна и нестабилна воздушна маса, утре попладне, во текот на ноќта меѓу среда и четврток и во текот на денот во четврток ќе има поинтензивни процеси во форма на краткотрајно невреме, со над 20 литри дожд на квадратен метар за кратко време. Се очекува ветер со брзина над 60 километри на час.

Во Скопје, исто така се очекува нестабилно време со повремен дожд, грмежи и засилен ветер, а во делови од котлината процесите ќе бидат во форма на краткотрајно невреме. Утринската температура ќе биде најниска во Берово, до 8 степени, додека дневната ќе биде највисока во Скопје, Гевгелија и Велес, со максимални 35 степени.

Жолтиот аларм укажува на умерена опасност од временските услови, со можност за умерени последици по околината и луѓето. Во петок и за време на викендот следува период на претежно стабилно време со слаб до умерен северен ветер, прогнозираат синоптичарите.