УХМР: Август беше екстремно жежок месец, највисоката температура измерена во Демир Капија
Август се карактеризира како екстремно топол и просечно врнежлив до сушен месец во споредба со многугодишните просечни вредности од 1991 до 2020 година, соопшти денеска Управата за хидрометеоролошки работи.
Препорачано
Средномесечната температура се движела од 18,2 степени во Лазарополе до 28 степени во Гевгелија. Споредено со просечните августовски средномесечни температури, за триесетгодишен период (1991-2020), овогодинешната температура беше 1,8 степени над просекот на ниво на државата, велат од Управата.
„Највисоката максимална температура беше измерена на 16 август во Демир Капија и изнесуваше 42,2 степени. Забележено е од 11 до 18 август појава на топлотен бран. Најниската минимална температура во текот на месецот беше измерена во Берово, на 1 август и изнесуваше 8,5 степени“, се вели во соопштението од УХМР.
Оттаму посочуваат дека во август, месечната сума на врнежи во државата се движела од 10 милиметри во Битола до 53 милиметри во Крива Паланка. Врнежите беа од дожд и град. Максимално дневно количество на врнежи од 35 милиметри беше регистрирано во Крива Паланка на 20 август.
Споредено со августовската просечна вредност за многугодишен период (1991-2020), измерената месечна сума на врнежи била помала за 30 отсто од просечната на ниво на држава.
