Бројни ресторани на Хвар протестираа со затворање на нивните објекти во центарот на градот, за да го свртат вниманието на сериозните проблеми со кои се соочуваат. Протестот е насочен кон извршната власт и градскиот совет, до кои рестораните упатуваат апел за носење одлуки кои ќе овозможат нормална работа во наредната сезона. Тие потенцираа дека на претходната сезона значително влијаел актуелниот закон за заштита од бучава, што резултирало со значително полоши приходи од очекуваните.

„Моменталната состојба во градот Хвар е таква што строго се спроведува Законот за бучава, според кој не може да се работи над 65 децибели, што е малку погласно отколку обичен разговор. Во такви услови не можеш да работиш или да организираш гостувања на клапа, а камоли настап на пијанист. Законот е таков каков што е, но сепак им даде можност на единиците на локалната самоуправа да носат одлуки за регулирање на локациите и надминување на дозволеното ниво на бучава во нивното подрачје. Оваа законска можност ја искористија и други градови, на пример Новаља и Пореч“, порачаа угостителите, пренесува Индекс.хр.

„Ја спасивме сезоната со креативноста на рестораните, како што знаевме и сакавме. Хвар отсекогаш бил град кој и на помладите и на постарите гости им нудел можност да се забавуваат. Конечниот биланс ќе ги прикаже загубите не само на претприемачите, станоиздавачите, рестораните итн., туку и загубите во буџетот и на градскиот и на државниот БДП, рекоа кафеанџиите.