Европската фудбалска федерација (УЕФА) во договор со националните федерации одлучи актуелната сезона да се заврши за време на летото, но веќе се појавија првите знаци на загриженост како фудбалерите ќе ги поднесат високите температури.

Британскиот весник „Експрес“ тврди дека на барање на клубовите, поради пандемијата на коронавирусот и играњето на натпревари за време на летото, ќе се воведат две нови правила.

Првото е дека наместо три измени, ќе може да се користат по пет како една од мерките за заштита на фудбалерите. Според планот на УЕФА, речиси сите лиги ќе мора да се играат во турбо ритам, по 2-3 натпревари неделно и зголемувањето на измените е едно од решенијата за заштита од повреди.

Второто правило е дека ви секое полувреме ќе се воведе задолжителна пауза за фудбалерите да можат да одморат и да се разладат.

Според првичните планови, најголем дел од лигите ќе продолжат да се играат од крајот на мај или почетокот на јуни, а натпреварите ќе се играат без присуство на гледачи.