Фудбалерите на Интер и Барселона ќе ги одмерат силите во реванш средбата од полуфиналето во Лигата на шампионите, која се игра во вторник на „Џузепе Меаца“ со почеток од 21 часот. Првиот натпревар во Каталонија заврши без победник 3:3, што значи дека сè останува отворено пред клучниот натпревар во Милано.

Сериозноста и тежината на натпреварот се потврдува и  со изборот на УЕФА за главен судија на натпреварот, тоа ќе биде искусниот Полјак, Шимон Марчинјак. Полскиот арбитар важи за еден од најдобрите светски судии  и ќе остане запаметен како човекот што ја делеше правдата во финалето на Светското првенство во Катар во 2022 година, каде што Аргентина ја победи Франција и по третпат стана светски шампион.

Помошници на Марчинјак ќе бидат неговите сонародници Томаш Листкиевич и Адам Купсик, додека четврти судија ќе биде Павел Рачковски. Контролата во ВАР-собата ќе ја имаат Холанѓаните Денис Хиглер и Пол ван Бекел.