Стадионот „Метрополитано“ во Мадрид, домот на шпанскиот фудбалски гигант Атлетико, повторно ќе биде центарот на европскиот фудбал. УЕФА денеска објави дека финалето од Лигата на шампионите во 2027 година ќе се одигра токму на овој модерен стадион, што ќе биде втор пат за осум години таму да се одржи најважниот меч од клупската сезона.

Првпат, „Метрополитано“ беше домаќин на големото финале во 2019 година, кога Ливерпул го совлада Тотенхем дојде до европскиот трофеј. Стадионот располага со капацитет од 70.692 седишта и од неговото отворање во септември 2017 година важи за едно од најмодерните стадиони на Стариот континент.

Покрај оваа одлука, УЕФА го соопшти и името на градот-домаќин на Суперкупот во 2026 година, тоа ќе биде австрискиот Салцбург, односно „Ред Бул арената“, која првпат ќе ја има честа да биде домаќин на овој престижен меч.