Министерството за образование и наука информира дека е повлечен од употреба учебникот по географија за втора година гимназиско образование.

Денес министерката за образование и наука Мила Царовска го потпиша решението на Комисијата со кое спорниот учебник се повлекува од настава.

Комисијата констатира дека учебникот е преоптоварен со статистички и други податоци и факти кои не одговараат согласно дидактичко-методскиот пристап за возраста на децата. Исто така, во неколку наставни содржини во учебникот се нарушени начелата на неповредливост на културата, историјата и другите вредности на граѓаните на Република Северна Македонија, што е спротивно на Законот за учебници за основно и средно образование.

Учебникот е одобрен по наставна програма од 2002 година.

Минатиот месец партиската младина на Алијанса за Албанците и Алтернатива протестираше пред Министерството за образование и наука, на кој ги скинаа и ги запалија спорните страници од учебникот по Географија. Тие побараа негово повлекување наведувајќи дека во учебникот има пасуси што се навредливи за Албанците.

• На страница 99 е наведено дека „Меѓу Албанците во Македонија има родови кои себе се сметаат за староседелци, главно тоа е македонско население кое во текот на турското владеење го примиле исламот и постепено се албанизирало. Меѓу нив, понекаде има и по некој род кој потекнува од некогашните Турци или Черкези.“

• На страница 99, Албанците се претставени како опасност за државата каде што е наведено дека „Населувањето на нови Албанци во Република Македонија не е завршен процес, и тој се одвива и денес – почетокот на XXI век. Ваквото, на моменти неконтролирано, населување може на најразлични начини да им наштети на сите во Република Македонија.“

• На страница 104, е наведено дека „ населувањето на албанското население во Македонија не се одвивало спонтано, туку во најголема мера насилно, планирано, со помош на турската власт или локалните аги и бегови, кои го дозволуваа доселувањето на албанско-муслиманското население. А ова ни кажуваат бројни автентични сведоштва. Македонците ги протерувале од родните села со многу сурови методи, како грабежи, киднапирања, убиства, физичко малтретирање – тепање, опожарување и слично.“, беа објаснувањата на Алијанса за Албанците и Алтернатива за палењето на учебникот.

Во рамки на планот за целосно реформирање на националниот образовен систем, еден од клучните чекори е обезбедувањето на квалитетни учебници и наставни содржини во основното и средното образование. Пропустите кои низ години се провлекуваат во повеќе учебници и материјали, со реформите ќе бидат целосно отстранети и системски решени. Новиот закон за дидактички материјали и учебници е веќе објавен на ЕНЕР и со него системски се спречува вакви содржини да се провлекуваат во учебниците, стои во соопштението од МОН.