Поранешниот грузиски претседател Михаил Саакашвили, кој се вратил во земјата пред локалните избори, денеска бил уапсен во Грузија, објави премиерот на таа земја, пренесува Интерфакс. 

Саакашвили во понеделникот вечерта објавил дека планира неделава да се врати дома, на денот на локалните избори, за да помогне во „спасување на земјата“ и повикал на улични протести по изборите.  

Саакашвили, кој досега живеел во Украина, изјави дека планира да се врати во саботата, и покрај тоа што му се заканува затвор поради обвинувањата за кои тој тврди дека се политички мотивирани.  

„Се решава судбината на Грузија, загрозен е опстанокот на Грузија и затоа купив авионски билет за 2-ри октомври, за да бидам со вас и да ја заштитам вашата (политичка) волја, да учествувам во спасувањето на Грузија“, рече Саакашвили во понеделникот. 

Осуден во отсуство на шест години затвор  

Тензиите меѓу владејачката партија Грузиски сон и опозицијата поддржана од Саакашвили нагло се зголемија по парламентарните избори минатата година, за кои опозицијата тврдеше дека биле наместени. Меѓународните набљудувачи тогаш рекоа дека основните слободи во голема мера се почитуваат. Во јуни 2018-та година, грузискиот суд го осуди Саакашвили во отсуство на шест години затвор за злоупотреба на службената положба и обид за прикривање докази за тепање на опозициски пратеник во парламентот додека тој бил претседател.  

Премиерот изјави дека полицијата ќе го уапси поранешниот претседател доколку се врати  

Премиерот Иракли Гарибашвили рече дека полицијата ќе го уапси Саакашвили доколку се врати.  

„Штом Саакашвили стапне на наша почва, тој ќе биде уапсен и испратен во затвор“, им рече премиерот на новинарите, пренесе агенцијата Интерфакс.  

Саакашвили, кој помогна да се формира Обединето национално движење (ОНМ), повика на пост-изборни протести преку видео обраќање на неговата Фејсбук страница.  

„Сите ние мора да гласаме и да ја откриеме нашата позиција, и само кога ќе се затворат избирачките места треба да излеземе на улиците во нашите градови и села и да ги заштитиме нашите гласови и нашата победа“, рече 53-годишникот. 

Пред да го отфрли политичкиот договор со опозицијата со посредство на ЕУ, Грузискиот сон се согласи да распише предвремени парламентарни избори доколку не освои барем 43 проценти од гласовите на локалните избори.