Клучната фигура зад популарниот форум за сајберкриминал „xss.is“ е уапсена во Киев за време на координирана операција на француските и украинските власти, со поддршка од Европол, пишува Франс24.

Според соопштението на Европол, осомничениот, кој наводно има речиси 20 години искуство во сајберкриминал, преку форумот и поврзаната платформа „thesecure.biz“ заработил над седум милиони евра. Тој се товари за посредување и олеснување на трговија со украдени податоци, хакерски алатки и други незаконски услуги.

Форумот „xss.is“, со повеќе од 50.000 корисници, беше едно од водечките места за хакери кои делувале на руски јазик.

Француските власти ја започнаа истрагата во 2021 година, а оперативната фаза се активирала во Украина во септември 2024 година. За време на апсењето, Европол воспостави виртуелен команден центар и испрати мобилен тим на терен.

Од Европол посочуваат дека платформите како „xss.is“ претставуваат критична инфраструктура за онлајн криминалот, обезбедувајќи анонимност и сигурни трансакции меѓу криминалци ширум светот.

Запленетите податоци ќе бидат темелно анализирани за поддршка на идни истраги во Европа и глобално.