Поедноставеното гранично преминување „Уан стоп“ помеѓу Македонија и Србија, дава резултати. Намалено е времето за чекање, велат патниците. Целта на новиот концепт на работа на најфреквентниот граничен премин е забрзување на протокот на патници, особено сега во летниот период кога метежот е најизразен.

Патниците за МРТ велат дека чекале по десетина минути, иако метежот е вообичаен за овој период од годината.

Системот со кој се врши само една контрола при влез во државата, започна да функционира пред една недела.

– Овој систем овозможува со едно застанување, вршење гранични проверки на граничните служби на двете земји, со што се избегнуваат двојни проверки и се скратува целокупната процедура на влез и излез – велат од МВР.

Поради големиот проток на патници на Табановце во функција се шест ленти за патнички моторни возила, дополнително за автобусите и транспортерите. Според статистиката на полицијата, минатиот викенд во државата влегле 63.000 лица.

Од почетокот на годината заклучно со јуни влез оствариле еден 1,5 милиони патници, што е зголемување споредбено со лани. Метежот е најголем во летниот период. Значаен број патници транзитираат низ земјава и се упатуваат на одмор кон јужниот сосед.