Активистката за климата Грета Тунберг денеска пред британскиот суд се изјасни за невина за нарушување на јавниот ред и мир минатиот месец кога беше уапсена на протест за климата во Лондон.

Полицијата ја приведе 20-годишната Тунберг на 17 октомври, откако таа и десетици демонстранти го блокираа влезот во хотелот каде што се одржуваше Конференција за нафта и гас.

Тунберг денеска пред судот го кажа само името и датумот на раѓање, а судот го закажа првото рочиште на 1 февруари во Вестминстерскиот суд во Лондон. Тунберг се товари за нарушување на јавниот ред и мир и непочитување на условите поставени од полицијата за да спречи „сериозно нарушување на работата на заедницата, гостите на хотелот и хотелот“.

Лондонската полиција ја обвини на 18 октомври и ја ослободи со кауција. Доколку биде прогласена за виновна, Тунберг се соочува со парична казна до 2.500 британски фунти.