Во нападите со руски беспилотни летала загинаа три лица, меѓу кои и осумгодишно дете, во село во североисточниот украински регион Суми, соопштија регионалните власти во вторникот во раните утрински часови.

– Околу полноќ, Русите започнаа масовен напад со беспилотни летала врз село. Имаме информации за три смртни случаи – изјави гувернерот на регионот Суми, Олех Хрихоров.

Во понеделникот, украинските власти објавија најмалку 10 смртни случаи и десетици повредени, главно во Киев и неговата околина, во руските ноќни воздушни напади, додека 28 лица беа убиени, а повеќе од 130 други беа повредени во Киев во ноќта помеѓу 16 и 17 јуни, во руски напад во кој беа лансирани повеќе од 440 дрона и 32 ракети, според украинските власти.

Генералштабот на украинските вооружени сили објави дека единиците за специјални операции, во соработка со ракетните сили и артилеријата, во понеделникот го нападнале објектот „Атлас“ во Ростовскиот регион, недалеку од источната граница на Украина, при што избил пожар.

Украинскиот претседател Володимир Зеленски од вторникот е во Хаг за да присуствува на дводневниот самит на НАТО. Зеленски изјави дека планира да се сретне со американскиот претседател Доналд Трамп за време на самитот на НАТО оваа недела.

Во интервју емитувано во вторник на „Скај њуз“, Зеленски истакна дека тимови од двете земји работат на деталите и на времето на состанокот.