Нашата анализа спроведена кај производителот на зелката што Хрватска не ја прими поради присуство на недозволен пестицид, покажала дека таков препарат не се употребувал. Ова го изјави министерот за земјоделство, шумарство и водостопанство Цветан Трипуновски.

– За пратката вратена од Хрватска веднаш беше интервенирано, беше проверено кој е производителот, кој е извозникот. Преку Инспекторатот за земјоделство беа направени дополнителни контроли, земени се мостри од извезениот градинарски продукт. Направените анализи испаднаа негативни односно покажаа дека таков препарат не е употребен во земјоделската култура – рече Трипуновски одговарајќи на новинарско прашање на настанот во Охрид каде што ги следеше активностите за вештачки мрест на ендемичниот вид охридска пастрмка.

Министерот Трипуновски рече дека не знае дали станува збор за некаква грешка на хрватските гранични контроли, но категорично изјави дека во Македонија кај посочениот земјоделец не се пронајдени такви недозволени пестициди ниту анализите покажале употреба на забранети средства.

Тој истакна дека се засилени контролите во делот на илегална трговија со препарати за заштита на растенијата.

– Работиме на проширување на дозволениот список препарати, со цел земјоделците да имаат пристап до повеќе препарати што се можеби и поевтини и со поголема ефикасност – рече министерот Трипуновски.

Земјоделците со кои разговараше „Слободен печат“ велат дека во ова време и не се применуваат никакви инсектициди.

– Не знам зошто некој би употребувал какво било средство за заштита на вака ниски температури. Особено, ако станува збор за зелка што се произведува на отворено. Но, дури и да се одгледува на затворено, пак температурите се ниски. Сите препарати за заштита се скапи и нема логика дека некој така бадијала ќе троши пари. Се знае кога тие се употребуваат – кога е топло и влажно. Секако, никој за никого не може да гарантира, си има надлежни служби што проверуваат – вели Ристо Велков од „Агросојуз“ – Струмица.

И тој посочи дека би требало да се прошири списокот на дозволени препарати, затоа што се јавиле многу модерни болести, па „јавна тајна“ е дека некои модерни средства земјоделците самостојно си ги купуваат од странство. Но, така има неконтролиран влез на пестициди.

Веста за вратената зелка од Хрватска направи паника кај граѓаните, тие не ја купуваат и цената значително ѝ се намали.

– Надлежните требаше веднаш да реагираат, да направат контрола, итно да излезат со информации. Дури и да имало кај некој производител третирање со недозволен производ, тој требаше јавно да се посочи, а не сите да страдаме – вели еден од продавачите на Зелениот пазар во Скопје.