Нешто сосема поразлично, симбиоза од талент, убавина и квалитетна музика, светскиот призвук кој доаѓа од Македонија го носи името „Trinity Strings“, пишува порталот „Еспресо.мк“.

„Trinity Strings“ е женски бенд составен од три девојки кои совршено владеат со своите инструменти – две вилиони и едно виолончело, создавајќи уметност. Марта Куч, Александра Мирсинова и Ирена Стојановска ги поместуваат границите на вообичаеното, веќе видено и слушнато.

– Трите работиме во Македонската опера и балет и некако енергиите од почетокот ни се соединија, а идејата првично дојде од Ирена. На почетокот бевме класичарски настроени, потоа започнавме да ги следиме светските трендови и малку се променивме – започнува Александра.

– Интересно беше на почетокот, немавме ни име. Настапувавме и ќе не прашаа како се викаме, ние велевме немаме име. Еднаш по настап, ми се свртеа девојкиве и ми рекоа: Ирена дај бре да најдеме име! Кажав Trinity затоа што оддамна го размислував тоа, некако ме асоцираше и на Светото тројство, три жени – вели Ирена.

Нивните енергии се различни, но тоа е она што ги спојува.

– Веќе 13 години се држиме. Јас сум најтемпераментна, огинчето одма ми се пали на глава, но немаме конфликти, се согласуваме добро – открива Марта. – Претежно сите караници се поврзани со работата, приватно многу се дружиме, си ги знаеме карактерите и гледаме да балансираме – се надоврзува Александра. – Почести се караниците меѓу мене и Марта бидејќи сме сестри, но затоа е тука Александра за да балансира меѓу нас. А често се случува бендови после толку време, па и порано, да се распаднат – вели Ирена.

Публиката сака атракција, а Ирена, Александра и Марта се синоним за атрактивност и квалитет на сцената.

– Во последниве години почнавме да се пласираме на сцената, да компонираме, да снимаме во студио. Мене отсекогаш ме привлекувала поп музиката, иако дома сме класичарски воспитувани. Ме привлекуваше електронската музика, а за среќа имаме време, седнуваме заедно и создаваме нешто интересно. Подготвуваме нови проекти, за некои песни треба да снимиме видео записи, снимаме песна со Николче Мицевски, негови се музиката и аранжманот, текстот е мој – открива Ирена.

Најавуваат концерт кој ќе биде вистинско изненадување, но и освежување на македонската сцена.

Имаат настапувано на многу фестивали, самити, верски конгреси, концертни настапи, редовни настапи во претседателската резиденција, како и најголемиот политички настан во државата на почетокот на јули Преспа форум за дијалог во Охрид. Но и во Беневенто, Рим, Наполи, како и во Луксембург по покана на познатиот инвеститор Марк Хобшаит.