Тринаесет лица беа уапсени вчера под обвинение за вмешаност во убиството на двајца блиски соработници на градоначалничката на Мексико Сити, Клара Бругада, пред три месеци.

Химена Гузман и Хозе Муњоз, советници на Бругада, беа убиени среде бел ден на 20 мај на булевар во јужните предградија на Мексико Сити.

Без да ги спомене мотивите на злосторството, градоначалничката им соопшти на новинарите дека меѓу уапсените има „три лица кои директно учествувале (…) и други кои биле вклучени во материјалната подготовка“ на нападот.

Апсењата биле извршени во зори, како дел од заедничка операција на локалните власти, федералната полиција и армијата.

По двојното убиство, властите изјавија дека станува збор за „добро испланиран напад“ и дека сторителите биле „искусни“ џелати.

За американската влада, ова злосторство ја демонстрира огромната моќ што ја имаат нарко-картелите во Мексико.

Во јуни 2020 година, Омар Гарсија Арфукс, сегашниот федерален секретар за јавна безбедност и тогашен началник на полицијата во главниот град, беше повреден кога беше нападнат од околу триесет платени убијци на моќниот картел „Нова генерација Халиско“.