Австриското Министерство за социјални работи и заштита на потрошувачите денес потврди дека е поднесена тужба против четирите најголеми малопродажни синџири во земјата: Bila, Spar, Hofer и Lidl, поради сомнителни попусти.

Тужбата е поднесена во име на државата од Здружението за информирање на потрошувачите, а причината се наводни неправилности за време на акциите за намалување на цените, објавува Еуроњуз.

Според австрискиот Закон за означување на цените, кој исто така ги следи европските прописи, трговците се должни да ја прикажат најниската цена од претходните 30 дена како основа во случај на попуст.

Министерството и здружението тврдат дека во „голем број случаи“ синџирите не се придржувале кон ова, што можело да ги доведе во заблуда потрошувачите во врска со реалните заштеди. Во пракса, трговците на мало честопати прво ги зголемуваат цените привремено, а потоа ги намалуваат, така што потрошувачите чувствуваат дека попустот е поголем отколку што е навистина.

Оваа тема е особено актуелна во текот на летото, бидејќи порастот на цените на храната веќе предизвика дискусии меѓу австриските политичари.