Поранешниот директор на УБК Сашо Мијалков изјави дека не се чувствува виновен за злоупотреба на околу еден милион евра државни пари за што се товари во случајот „Трезор“, кој денеска стартуваше од почеток во Кривичниот суд во Скопје. Тој, во судот стигна со полициско комбе од струшкиот затвор каде издржува затворска казна за случајот „Империја“, за кој призна вина.

На судењето за случајот ,,Трезор”, кој неодамна падна на Апелација, со што на Мијалков му беше укината осумгодишната затворска казна, обвинителот Ајтан Ајро во воведните зборови, побара од судот, согласно напатствијата на Апелација, да даде наредба за изготвување на вештачење.

Адвокатите на Мијалков потенцираа дека судот може да издаде наредба за изготвување на супервештачење, но тоа е во случај кога веќе имало две спротивставени вештачења.

– Обвинителството можело во фаза на истрага да изготви вештачење, а во случајот не изготвило. Сега не може да го користи судот да ги превзрме надлежностите на обвинителството – беше дециден адвокатот Петар Василев.

Судијката истакна дека дополнително, во текот на судењето, судот ќе се изјасни за барањето околу вештачењето.

По воведниот говор на обвинителот Ајро, кој истакна дека останува на претходно поднесеното обвинение, обвинетите се изјаснија по прашањето дали чувствуваат вина.

– Разбрав за што се работи и можам само да се произнесам дека не се чувствувам виновен – истакна Мијалков.

Вина, како што рекоа, не чуствуваат ниту обвинетите Небојша Стајковиќ и Тони Јакимовски.

Предметот „Трезор“, го отвори поранешното СЈО, а се однесува на злоупотреба на средства од Буџетот на државата за набавка на електронско-комуникациска опрема за потребите на Петтата управа при УБК и обука за нејзино користење од фирма од Велика Британија.