Македонија ЃП и ЦСКА Софија одиграа без голови во првиот натпревар од второто квалификациско коло за пласман во Лигата на конференции, иако бугарскиот тим во вториот дел играше со играч повеќе.

„Лавовите“ во финишот од првото полувреме останаа без Лемос кој беше исклучен поради два жолти картони, но и покрај тоа фудбалерите на Бајрами одлично се носеа во вториот дел со фаворизираниот противник.

Тренерот на ЦСКА Софија, Саша Илиќ на прес-конференцијата по натпреварот се пожали на топлотото време и порача дека се надева на подобра игра не неговите фудбалери во реваншот.

– Не барам алиби во спарното време и помалиот терен како и во долгиот пат. ЦСКА требаше да игра поедноставно и побрзо, особено откако ривалот доби црвен картон. Сепак, се надевам дека следниот четврток ќе бидеме подобри. Можеме да зборуваме дека требаше да ги искористиме шансите, меѓутоа нема да зборувам ниту за тоа. Повеќе нема изразити фаворити во фудбалот, секогаш мора да си на ниво за да победиш. Знаев дека Македонија ЃП е дисциплинирана екипа која може лесно да направи проблем. Ни пречеше Лемос со неговата игра, а потоа по црвениот немавме преголеми проблеми. Разочарани сме како и фановите кои очекуваат многу повеќе од нас. Игравме во нехумани услови, на 40 степени и лош терен, ама тоа не смее да е алиби. Се надевам дека ќе покажеме друго лице, ЦСКА мора да игра многу подобро од денес. Јас сум човек кој е многу искрен и ќе кажам дека малку играчи покажаа добра игра – рече Илиќ.