Тренчевска: Со новиот колективен договор ќе ги задржиме добрите административци
„Новиот колективен договор е историски, бидејќи во него има многу поволности за вработените во целиот јавен сектор. Тоа се околу 130 илјади вработени, но најважно е дека дефинираме систем на плати во јавниот сектор“ изјави министерката за труд и социјална политика, Јована Тренчевска во „Само вистина“ на Канал 5.
Препорачано
Таа додаде дека со новото системско решение за плати се гарантира постојан раст на платите во јавниот сектор и тие нема веќе да зависат од тоа кој е министер или премиер.
„Растот на платата ќе биде врзан со просечната плата. Од март 2025 година ќе иамме нов систем на плати, каде имаме коефициент на сложеност кој се многу со порастот на просечната бруто плата во државата“ рече Тренчевска.
Министерката кажа дека од септември, оваа година, сите вработени во јавниот сектор ќе добијат покачување од 10 отсто на платите, а до крајот на годината ќе добијат и регрес за годишен одмор од 10 илјади денари.
„Од 2024 година регресот ќе биде најмалку 30 отсто од просечната плата. Тоа значи дека со гранските колективни договори регресот за годишен одмор може да биде договорен и повисоко“ рече Тренчевска.
Таа додаде дека по подавањето рака и прес-конференција, можеа претставниците кои не се задоволни да кажат дека не се задоволни, но и тие дале поддршка на тоа што се кажало и се согласиле со колективниот договор.
„Претставникот на КСС можеше да каже дека не е задоволен. Но тој стоеше и даде поддршка на тоа што го кажавме ние. Се согласи со се. Не даде изјава дека не се согласува, а следниот ден рече дека не се согласува со договореното“ рече Тренчевска.
Министерката кажа дека потоа овие синдикати не учествувале во работната група и на состаноците каде се финализирал текстот на колективниот договор, туку се обраќале само пред медиумите.
„Нема да навлегувам во причините за незадоволството, тоа треба да си кажат КСС и СОНК, но на ова покачување не треба да има незадоволство“ рече Тренчевска.
Таа објасни дека со новиот колективен договор се креира систем за плати, според кој платите во јавниот сектор ќе растат согласно растот на просечната палта, без разлика на тоа кој е министер или премиер.
