Трамп воведе царини на острови на кои живеат само пингвини: „Нѐ краделе со години“
Најновите царини кои администрацијата на американскиот претседател Доналд Трамп ги воведе на увозот на производи опфаќаат и ненаселени или речиси ненаселени територии, вклучително и области во Австралија и Норвешка.
Препорачано
Според списокот објавен од Белата куќа на мрежата Х, САД примениле царина од 10 отсто на стоки од островот Херд и Мекдоналд – австралиски територии лоцирани поблиску до Антарктикот, кои се целосно ненаселени, пишува Би-би-си.
Островите се едно од најоддалечените места на земјата и немаат постојани жители, но се дом на голем број пингвини, фоки и морски птици. До нив може да се стигне само со двонеделно возење со брод од Перт на западниот брег на Австралија. Последен пат луѓето стапнале таму пред речиси 10 години, пишува „Гардијан“.
Царини од 10 отсто беа воведени и за стоките од Свалбард и Јан Мајен, две оддалечени норвешки територии во близина на Северниот пол, кои заедно имаат околу 2.500 жители. Не е јасно какви производи извезуваат тие територии во САД.
Откако се дозна дека во тарифите на Трамп се вклучени и области каде никој не живее, социјалните мрежи се вжештија.
„Пингвините нè краделе со години“, напиша поранешниот директор за комуникации на Трамп, Ентони Скарамучи, кој сега е чест негов критичар.
The penguins have been ripping us off for years pic.twitter.com/984itnzxay
— Anthony Scaramucci (@Scaramucci) April 3, 2025
„Пингвините на островот Херд и Мекдоналд нè искористуваа предолго. Време е да им се спротивставиме!“ напиша поранешниот конгресмен Том Малиновски на X.
Според податоците на Светска банка, во 2022 година САД увезле производи во вредност од 1,4 милиони американски долари од островот Херд и Мекдоналд, а тоа е увоз на машини и електрична опрема, пишува „Гардијан“ и додава дека не се знае за каква стока се работи.
Во претходните пет години, увозот од островите Херд и Мекдоналд се движел од 15.000 до 325.000 долари годишно.
Иако територијата нема жители, таа е управувана од Австралија, а самата територија има ексклузивна економска зона (ЕЕЗ). Покрај тоа, регионите без тарифни бариери можат да станат упориште за офшор производство во иднина.
