Американскиот претседател Доналд Трамп ќе ја оствари својата втора државна посета на Велика Британија од 17 до 19 септември, објави Бакингемската палата.

Републиканскиот претседател и неговата сопруга Меланија ќе бидат примени од кралот Чарлс III, британскиот шеф на државата, и кралицата Камила, во Виндзор, во близина на Лондон.

Доналд Трамп беше поканет со писмо од монархот, кое му го достави британскиот премиер Кир Стармер во февруари.

„Ова е првпат еден лидер да биде поканет двапати во официјална посета“ на земјата, рече Стармер во тоа време, што американскиот претседател го опиша како „огромна чест“ неколку минути подоцна.

За време на неговиот прв мандат, од 2017 до 2021 година, Доналд Трамп беше примен од кралицата Елизабета Втора.

За разлика од францускиот претседател Емануел Макрон, кој се обрати пред британскиот парламент за време на неговата неодамнешна официјална посета, Доналд Трамп не е предвидено да се обрати пред Долниот дом, бидејќи тој нема да заседава во тој момент, поради пауза поради партиските конференции.