Американскиот претседател Доналд Трамп изрази сомнежи во врска со политичките случувања во Јужна Кореја, само неколку часа пред средбата со новоизбраниот претседател на земјата, Ли Џае Мјунг, во Белата куќа.

„Што се случува во Јужна Кореја? Изгледа како чистка или револуција. Не можеме да го дозволиме тоа и да водиме бизнис таму. Денеска ќе се сретнам со новиот претседател во Белата куќа. Ви благодарам за вниманието кон ова прашање!!!“, напиша Трамп на својата мрежа „Трут соушл“.

Трамп не откри што точно предизвикало вакви критики кон својот јужнокорејски колега.

Пред доаѓањето во Вашингтон, Ли ја реализираше својата прва билатерална посета како претседател во Токио, каде се сретна со јапонскиот премиер Шигеру Ишиба. Самитот беше протолкуван како порака на единство и обид за јакнење на позициите, додека и Јапонија и Јужна Кореја се соочуваат со нови предизвици од администрацијата на Трамп. Ли е првиот јужнокорејски лидер што ја избра Јапонија за прва билатерална посета по нормализацијата на односите во 1965 година.