Американскиот претседател Доналд Трамп изјави дека ќе го запре на 90 дена спроведувањето на некои од новите царини што ги објави, но дополнително ќе ги зголеми царините за увозот од Кина, јавија американските медиуми.

Ненадејната промена дојде помалку од 24 часа откако стапија на сила новите американски царини за увозот од десетици земји кои се трговски партнери на Соединетите држави.

Новите трговски бариери им нанесоа удар на пазарите, ја зголемија веројатноста од рецесија и доведоа до контрамерки од Кина и од Европската унија.

Трамп рече дека ќе ги зголеми тарифите за увоз од Кина на 125 отсто од 104 отсто, кои стапија на сила на полноќ. Нагласи дека ќе ги зголеми царините за Кина поради „недостигот од почит што Кина го покажа кон светските пазари“.

Претходно во средата Кина објави царини од 84 отсто на увозот од САД.

„Ја одобрив 90-дневната пауза и значително намалување на реципрочните тарифи од 10 отсто во тој период“, рече Трамп додавајќи дека и одлуката за паузирање и зголемување на царините за Кина стапуваат во сила веднаш.