Британскиот крал Чарлс Трети и американскиот претседател Доналд Трамп, по вчерашниот свечен ручек, размениле подароци, Како што дознава Би-би-си, кралот му подарил на претседателот на САД рачно врзана кожна книга по повод 250-годишнината од Декларацијата за независност. За возврат, Трамп на домаќинот му подарил реплика на мечот на поранешниот претседател Двајт Ајзенхауер.

Кралот, исто така, на Трамп му подарил знаме на Обединетото Кралство, кое се веело над Бакингемската палата на денот на неговата втора инаугурација во јануари 2025 година, додека на првата дама ѝ подарил сребрена чинија, рачно изработена од северноирската уметница Кара Марфи и персонализирана торба Ања Хиндмарч.

Исто така, брачната двојка Трамп доби заеднички подарок – сребрена рамка за фотографии со врежан монограм од нивните иницијали.

Репликата на мечот, која Трамп му ја подарил Чарлс Трети е „потсетник на историското партнерство кое беше клучно за победата во Втората светска војна“, а на кралицата Камила ѝ бил подарен брош од 18-каратно злато, дијаманти и рубини.

За време на посетата на Трамп, пред замокот Виндзор, каде што се одржува состанокот, се собраа демонстранти против Трамп и пропалестински демонстранти.

Една од главните теми во медиумите беше изгледот на Меланија Трамп – виолетова капа која, како и на втората инаугурација, ѝ покрива половина од лицето и темно сив костум, а според стилистката на познатите личности и соработничка на магазинот „Вог“, Маријан Квеј, тој моден избор не е случаен.

„Шапката со широк обод што ѝ го крие лицето укажува на ставот дека сака сите очи да бидат вперени во нејзиниот сопруг и неговата агенда додека е тука. Бојата се совпаѓа со бојата на вратоврската на нејзиниот сопруг, што е уште еден вид на поддршка на агендата на нејзиниот сопруг за време на оваа државна посета“, оцени таа.