Познатиот британски новинар и ТВ водител Пирс Морган вечерва објави дека сојузникот на Трамп и десничарски коментатор Чарли Кирк починал откако бил застрелан на кампусот на Универзитетот во Јута, пренесува Н1.

Недолго по него, самиот Доналд Трамп проговори и ја потврди веста на неговата социјална мрежа.

Кирк, 31-годишен конзервативен активист и извршен директор на Turning Point USA, беше застрелан во вратот денес додека држеше говор на Универзитетот во Јута.

Кирк е најпознат како основач на Turning Point USA, непрофитна организација која работи на стотици американски универзитети и средни училишта, промовирајќи конзервативни идеи меѓу младите луѓе.

Би-би-си го опишува како еден од „највлијателните конзервативни инфлуенсери во САД денес“, додавајќи дека да се нарече тој „огнен говорник“ би било потценување.

Неговата организација мобилизира и финансиски поддржува млади активисти, а Кирк изгради публика од милиони следбеници на социјалните медиуми – повеќе од 5,2 милиони на „Икс“ и 7,3 милиони на „ТикТок“.