Неколку европски претставници изразија незадоволство од говорот на американскиот претседател Доналд Трамп на 80-тото заседание на Генералното собрание на ОН, оценувајќи дека неговиот говор бил „во најдобар случај неинформативен, а во најлош случај контрапродуктивен“, пишува Политико.

„Тој не ја кажува вистината. Трамп се однесуваше како Европа да не направила ништо, иако воведе строги санкции врз Русија, ја намали зависноста од руските енергетски извори и потроши милијарди за поддршка на Украина“, изјави висок европски претставник.

Според достапните информации, неколку претставници на земјите-членки на ЕУ сметаат дека критиките на Трамп се неосновани и дека тие ги игнорираат конкретните напори на Европа во справувањето со последиците од војната во Украина.

Во својот говор, американскиот претседател го нарече „срам“ тоа што Европа истовремено води политика на спротивставување на Москва и продолжува да купува руски енергетски производи. Тој, исто така, ги повика европските земји да се приклучат на американските царини за увоз од Русија.