Администрацијата на претседателот на Соединетите Американски Држави, Доналд Трамп, им нареди на службениците на Службата за имиграција и царина (ИЦЕ) да ги „паузираат“ рациите и апсењата на мигранти во хотели и ресторани, објави „Њујорк тајмс“.

Суспензијата на рациите и апсењата се однесува и на фармите и во земјоделската индустрија, наведува „Њујорк тајмс“, додавајќи дека ги добил овие информации врз основа на изјавите на тројца службеници запознаени со ситуацијата и една е-пошта за „внатрешна употреба“.

Голем број од луѓето кои во САД престојуваат нелегално работат во угостителството и земјоделството.

Трамп претходно изјави дека наскоро ќе издаде наредба во врска со ефектите од неговите антиимиграциски мерки врз американското земјоделство и угостителство, два сектори на економијата кои во голема мера зависат од мигрантската работна сила.