Претседателот на САД, Доналд Трамп, денеска објави на својата социјална мрежа Truth Social, фотографија од пораката од генералниот секретар на НАТО, Марк Руте, во која му честита за неговата решителна акција во Иран и за убедувањето на сите сојузници на НАТО да издвојат најмалку пет проценти од нивниот БДП за одбрана.

„Честитки и ви благодарам за вашата решителна акција во Иран, тоа беше навистина извонредно и нешто што никој друг не смееше да го направи. Нè прави сите побезбедни“, се вели во пораката на Руте, пренесува Ројтерс.

Функционерите на НАТО денеска потврдија дека Руте му испратил порака на Трамп пред неговото патување во Хаг за самитот на лидерите на НАТО.

„Вечерва летате кон уште еден голем успех во Хаг за да постигнете нешто што ниту еден американски претседател не успеал да го направи со децении. Европа ќе плати за членството во НАТО на достоинствен начин, како што треба. Тоа ќе биде вашата победа“, му рече Руте на американскиот претседател.