Американскиот претседател Трамп повторно ја турка светската економија кон неизвесност, објавувајќи нови царини и истовремено сигнализирајќи отвореност за преговори – но само доколку САД добијат што сакаат. Неговиот став е јасен, „Нема повеќе трговски дефицити“. Оваа политика веќе предизвика тревоги во Европа, Кина и на глобалните пазари, но Трамп инсистира дека тоа е „лекот“ за економските проблеми на Америка.

Во последните денови, Трамп разговарал со лидери од цел свет, кои, според неговите зборови, „гореа“ да постигнат договор. Меѓутоа, тој не сака да слушне за продолжување на статус квото. Кина, која со САД годишно има трговски вишок од стотици милијарди долари, е главна мета.

„Ако не го решиме ова, нема да има договор“, рече Трамп, додавајќи дека е подготвен да преговара, но само доколку Пекинг се согласи да го намали вишокот.

Но, Кина не е единствената на мета. Европската Унија, која Трамп ја опишува како „економски непријател“, е следна во редицата. Тој тврди дека ЕУ систематски ги „ограбува“ САД преку трговските нерамнотежи и заштитни мерки. „Тие создадоа бариери за нашите производи, а нивните ги пуштаат без проблем“, рече тој, алудирајќи на автомобилската индустрија и земјоделските субвенции.

ЕУ под притисок: Што може да очекува Европа?

Европа веќе се подготвува за најлошото. Германските производители на автомобили, француските винари и италијанските прехранбени компании се загрижени дека новите царини ќе ги погодат нивните извозни пазари. Доколку САД воведат дополнителни такси за земјите со најголем дефицит, Германија, Франција и Италија би биле меѓу најпогодените.
ЕУ формално се закани со одмаздни мерки, вклучувајќи царини на американски стоки како бурбони, мотоцикли „Harley-Davidson“ и производи од агросекторот. Но, Трамп не се плаши од такви закани.

„Тие знаат дека немаат што да ми направат. Ние сме нивниот најголем пазар“, рече тој.

Објавувањето на царинските мерки веќе предизвика нестабилност на берзите. Инвеститорите се плашат од нови трговски војни, кои би можеле да го забават глобалниот раст. Трамп, сепак, го смета ова за привремен ефект.

„Понекогаш мора да се трпи краток пад за долгорочна добивка“, рече тој.

Паралелно со економските мерки, Трамп размислува и за сместување на американски затвореници во мега-затворот CECOT во Ел Салвадор. Оваа идеја доаѓа по понудата на претседателот Наиб Букеле, кој ветува дека ќе ги прими осудените криминалци за 20.000 долари годишно по лице. Сепак, призна дека прво мора да се провери дали ова е законски изводливо.
Организациите за човекови права веќе ја критикуваат идејата, потсетувајќи на лошите услови во салвадорските затвори и масовните кршења на правата под Букеле. Но, Трамп не се воздржува: „Ако некој е подготвен да ги прифати овие криминалци, јас сум за.“

Трамп јасно ја исцртува својата стратегија,  преговори од позиција на сила, без компромиси. Неговиот пристап е директен и непопустлив – САД повеќе нема да трпат економски асиметрии, туку бараат конкретни промени. Ова не е простa преговарачкa тактикa, туку фундаментална промена во американскиот економски дипломатски стил. Трамп верува дека само со цврстина и недвосмислени барања САД можат да ги зачуваат своите економски интереси на глобално ниво. Дали светот ќе се прилагоди или ќе дојде до ескалација, останува да се види. Едно е сигурно, трговските војни се враќаат, а Европа и Кина мора да бидат подготвени за борба.