Расположението во Белата куќа е на историски ниско ниво, додека администрацијата на Доналд Трамп се соочува со нов бран притисок поврзан со скандалот Џефри Епстин, објави „Политико“. Според извори блиски до Белата куќа, претседателот е бесен и фрустриран, а неговиот тим исцрпен и парализиран поради медиумското внимание и теориите на заговор што произлегуваат од случајот.

Последниот удар за Белата куќа дојде откако државната обвинителка Пам Бонди објави информации од случајот Епштајн, што предизвика лавина од медиумски реакции. Истовремено, Вол Стрит Журнал објави тврдење дека Трамп му испратил роденденска порака со сексуална конотација на Епштајн – тврдење што претседателот го негира и поднесе тужба за клевета.

Скандалот ги активираше критичарите во сопствениот табор – од Стив Банон до Лора Лумер – кои предупредија дека оваа ситуација може да го загрози претседателскиот мандат на Трамп. Иако претседателот се обиде да ја пренасочи јавната дебата со објави за нови трговски договори и критики кон Барак Обама, тоа не ја смири состојбата.

Според извори, неколку пратеници во Претставничкиот дом бараат целосно објавување на документите за Епштајн, поради што беа откажани неколку гласања оваа недела. Раководството на републиканците се наоѓа во незавидна позиција – обидувајќи се да задржи лојалност кон Трамп додека се справува со растечко незадоволство кај своите избирачи.

„Сведоци сме на вистински бунт во Конгресот“, изјави еден извор близок до Белата куќа. „Пандорината кутија е отворена.“