Советот на Град Скопје на денешната седница донесе заклучок со кој ја задолжи градоначалничката Данела Арсовска и ЈСП „Скопје“ во рок од седум дена да достават информации за актуелните состојби во јавниот градски превоз, за состојбата во ЈСП, како и на начинот на организација и реализација на јавниот градски превоз.

Заклучокот следеше откако дневниот ред беше дополнет по предлог на советничката Љубица Јанчева од СДСМ, која побара информација за состојбите во градскиот превоз. Како што образложи Јанчева, советниците за сето она што се случува дознаваат од медиумите, вклучително и за огласот со кој се бараат превозници за линиите 20 и 22. Таа праша според која одлука се спровел огласот, дали ЈСП е во можност да ги задоволи потребите од 350 автобуси и со колку располага, што се планира понатаму со јавниот градски превоз.

И советникот Гордан Шутаров посочи дека што поскоро треба да се добијат тие информации за да се има комплетна слика за она што се случува меѓу ЈСП и приватните превозници и на наредната седница да се повика претседателот на надзорниот одбор да се одговори дали се почитува одлуката за линиски превоз на патници.

Сите овие аргуметни, треба во најбрз рок да ги добие Советот на Град Скопје за да добиеме јасна слика за тоа што поддржуваме, што субвенционираме, што се почитува, што не, и да бидеме одговорни да излеземе пред граѓаните и да им ја расветлиме ситуацијата заради тоа што се доведени до заблуда – истакна Шутаров.

Во дискусијата дел од советниците посочија дека раскинувањето на договорот со приватните превозници не значи дека долгот кон нив не постои, тој останува, но побараа да се знае колку е точно тој долг затоа што директорот на ЈСП „Скопје“ кажува една сума, превозниците друга, а градоначалничката тврди дека долг нема.

Во отсуство на градоначалничката Арсовска, ставовите на Град Скопје ги образложуваше нејзиниот заменик Александар Трајановски, советник од ГРОМ, кој рече дека не може Скопје да биде заложник на, како што рече „баграта“ на Ленин, на условите кои тие ги диктираат, а во договорот со Градот така не е регулирано. Притоа тој ги обвини советниците дека наместо да ги штитат интересите на јавното претпријатие, штитат приватни интереси.

Страшо Ангеловски од ВМРО-ДПМНЕ побара Трајановски да им се извини за навредите на превозниците, кои се чесни луѓе што совесно работат и си го заработуваат лебот. На ова, Трајановски реплицираше дека нема зошто да се извини, а дека оние што се чесни можат да се пријават на огласот со кои се бараат превозници.