Ако по утрото денот се познава, поранешната гувернерка на Јужна Каролина, Ники Хејли, може да се надева на победа против поранешниот претседател Доналд Трамп во трката за претседателска номинација на републиканците.

На традиционалното полноќно гласање во местото Диксвил Ноч во Њу Хемпшир, Хејли освои шест гласа, а Трамп ниту еден.

Гратчето Диксвил Ноч веќе 16 изборни циклуси привлекува големо внимание на јавноста во САД зашто таму почнува гласањето во Њу Хемпшир и резултатите се познати неколку минути по полноќ, што може да ги охрабри гласачите во целата сојузна држава. Раното гласање е воведено за да можат железничарите брзо да ја исполнат својата должност и да се вратат на работа и таа практика е задржана до денес, пред сѐ за да се привлече вниманието, барем секоја четврта година, кон местото со четири постојани жители, според пописот од 2020 година. Бројот на гласачите не им бил важен на многумина претседателски кандидати за да се појават во Диксвил Ноч на предизборен митинг. Таму своите кампањи лично ги воделе идните претседатели Џорџ Х.В. Буш и Џорџ В. Буш, Роналд Реган и Бил Клинтон.

Во просториите на поранешниот хотел „Балсамс“ синоќа гласале вкупно шест жители од Диксвил Ноч и од околните населби – четворица регистрирани републикански гласачи и двајца независни. Како и вообичаено секоја изборна година, во салата имало десет пати повеќе репортери отколку гласачи, еден кроток пес и многу чоколадни бисквити.

– Ви благодарам, Диксвил Ноч! Одличен почеток на убав ден во Њу Хемпшир – порача апсолутната победничка Хејли.

За денот навистина да биде убав за Хејли, ќе мора да ја продолжи низата поклопувања на кандидатите што по победата во Диксвил Ноч победиле и на гласањето во целата сојузна држава. Во периодот од 1964 до 1992 година победникот од Диксвил Ноч во ноември бил претседателски кандидат на републиканците.

– Немаме волшебна моќ од тука да им порачаме на другите што да прават ниту можеме да претскажеме што ќе се случи. Понекогаш сме во право, понекогаш не сме. Но, главната порака што ја испраќаме е дека луѓето не треба да се воздржуваат од учество во демократскиот процес. Ако можат овие луѓе тука во дивината да дојдат на полноќ за да гласаат, сите до еден, можеби и другите ќе го сфатат гласањето малку посериозно. Единственото позитивно е тоа што ќе охрабриме некого да излезе и да гласа – вели Тол Тилотсон, син на сопственикот на стариот хотел и организатор на гласањето.

Хејли на анкетите заостануваше зад Трамп во Њу Хемпшир, но таа објави дека нејзината цел е да помине „подобро отколку во Ајова“, каде што заостануваше 30 проценти зад поранешниот претседател. Поранешната гувернерка на Јужна Каролина упорно тврди дека, во споредба со Трамп, би му била посериозен противкандидат на демократот Џо Бајден на претседателските избори во ноември. Третиот истакнат потенцијален кандидат меѓу републиканците, Рон Десантис, завчера се откажа од трката „откако заклучил дека нема шанси да го совлада Трамп“ и им препорача на своите симпатизери да го поддржат поранешниот претседател.