Топлотните бранови се новата климатска реалност во Европа, предупредуваат експертите.

Јужна Европа повторно доживува невиден топлотен бран, со температури кои достигнуваат и до 46 степени Целзиусови во регионот Уелва во Шпанија – нов национален рекорд за јуни, и 46,6 степени во Мора, Португалија . Во меѓувреме, Италија, Грција, Португалија и Западен Балкан исто така се справуваат со топлотни бранови, проследени со пожари и жртви.

Во Шпанија, четири лица ги загубија животите поради топлотен бран. Вчера, пожарникарите пронајдоа две тела по пожар во градот Коско, на североистокот од земјата.

Експерт на Светската здравствена организација издаде остро предупредување, повикувајќи на повеќе акции за да се спречат десетици илјади „непотребни и во голема мера спречливи смртни случаи“ .

„Веќе не е прашање дали ќе имаме топлотен бран, туку колку од нив ќе доживееме оваа година и колку долго ќе траат “, рече Марисол Иглесијас Гонзалез, одговорна за климатските промени и здравјето во СЗО во Бон.

Што се однесува до бројот на луѓе кои би можеле да бидат изложени на ризик, Пјер Масело, статистичар на Лондонската школа за хигиена и тропска медицина, за Политико изјави дека овој топлотен бран би можел да предизвика повеќе од 4.500 дополнителни смртни случаи помеѓу 30 јуни и 3 јули. Земјите што веројатно ќе доживеат највисоки стапки на прекумерна смртност се Италија, Хрватска, Словенија и Луксембург, рече тој.

Топлотните бранови одземаат повеќе од 175.000 животи годишно во европскиот регион. СЗО во понеделникот повтори дека климатските промени, предизвикани од согорувањето на фосилни горива, значат дека топлотните бранови ќе станат почести, поопасни и поинтензивни, што ќе доведе до посериозни болести и смрт.

Речиси две третини од шпанските градови добиле здравствени предупредувања, според Националната метеоролошка служба. Нејзин претставник изјави дека се очекува интензивна топлина низ целата земја до 3 јули. Предупредувања за топлотен бран се во сила и во Франција, Италија, Португалија и Грција.

Грчката влада, исто така, издаде предупредувања за загадување на воздухот од пожарите што ги опустошија крајбрежните градови во близина на Атина. Во исто време, повеќе од 50.000 луѓе се евакуирани во Турција, главно поради силни пожари во близина на Измир.

СЗО ги советува граѓаните да останат хидрирани, да ја избегнуваат пладневната топлина и да ги одржуваат своите домови ладни, особено на ранливите групи, вклучувајќи ги постарите лица, децата, работниците на отворено, бремените жени и лицата со хронични заболувања. Оние кои земаат лекови како што се антидепресиви или лекови за крвен притисок, исто така, треба да бидат внимателни.

Сепак, не станува збор само за управување со топлотните бранови, туку и за подобра подготовка, соопшти СЗО. Во истражувањето од 2022 година, само 21 од 57 земји во европскиот регион пријавиле дека имаат национален акционен план за здравје од топлина. Од нив, 14 беа во ЕУ.