Еден од најдобрите фудбалери од средниот ред на сите времиња, Тони Крос (34) летово ја заврши својата играчка кариера со настап на Европското првенство во родната Германија. Во текот на кариерата Крос настапуваше за Баерн Минхен и Реал Мадрид со кои освои дури шест европски шампионски титули.

Најголемиот успех со германската репрезентација го постигна пред 10 години во Бразил, кога стана светски шампион. Крос сега беше гостин во германскиот подкаст „Einfach mal Luppen“ заедно со неговиот брат Феликс, исто така поранешен фудбалер. Тие разговараа за различни актуелни теми, вклучувајќи ја и Бундес лигата, каде што минатата сезона Баер Леверкузен ја освои титулата без пораз, со што стави крај на 11-годишната доминација на Баерн. Купот го освои и Баер, а единствениот пораз во целата сезона беше во финалето на Лига Европа од Аталанта.

Крос прогнозира дека тимот на Чаби Алонсо ќе ја брани титулата, а тој не го гледа Баерн за вицешампион:

– Баер Леверкузен ќе ја брани титулата, а мојата прогноза е дека Борусија Дортмунд ќе го освои второто место. Пред месец и половина би рекол дека Дортмунд во најдобар случај ќе биде на петтата позиција. Мислам дека имаа многу лоши трансфери во минатото, но ова лето завршија одлична работа – рече Тони Крос.

Браќата Крос предвидуваа и дека Баерн ќе заврши трет, а РБ Лајпциг на македонскиот репрезентативец Елиф Елмас четврти, исто како и минатата сезона.

На крајот Крос го кажа своето мислење и за сезоната во Шпанија:

– Мислам дека тоа ќе биде долго време суверена приказна, Реал секако ќе ја одбрани титулата шпански првак, не се сомневам во тоа. Трката за второто место ќе ја добие Атлетико Мадрид пред Барселона – се зборовите на Тони Крос.