Сер Тони Блер, поранешен премиер на Велика Британија, изјави дека би бил подготвен да изврши хуманитарна улога во Газа доколку постои реална перспектива за промена на текот на настаните во енклавата, пренесува Фајненшал тајмс.

Извештаите во Израел тврдат дека израелскиот премиер Бенјамин Нетанјаху се надева да го постави Блер како „хуманитарен координатор“ во Газа, врз основа на искуството на поранешниот британски премиер во регионот.

На Блер, поранешен меѓународен пратеник на Блискиот Исток, не му била понудена позицијата, соопшти неговиот кабинет. Но, неговите сојузници рекоа дека би размислил да игра хуманитарна улога доколку смета дека може да направи вистинска разлика.

„Како што знаете, Блер има канцеларија во Израел и продолжи да работи на прашања во врска со Израел и Палестина. Тој очигледно разговара за ситуацијата со голем број луѓе во регионот и на други места за да види што може да се направи. Но, нема понудена или преземена улога“, рече портпаролката на Блер.

Приватно, колегите на Блер рекоа дека тој би ја разгледал улогата само „доколку тоа е вистинска шанса да се смени курсот на хуманитарната страна“. Еден додаде: „Сè уште ништо не е дискутирано или решено“.

„Тајмс оф Израел“ ги цитираше извештаите на весникот „Јнет“ дека Нетанјаху верува дека Блер може да ја подобри хуманитарната ситуација во Газа и да го намали меѓународниот притисок врз Израел додека ја продолжува својата офанзива против Хамас.

Инет, цитирајќи неименувани високи функционери, рече дека Нетанјаху се надева дека ќе го искористи искуството на Блер во регионот за да ја намали меѓународната загриженост за хуманитарната ситуација.

Одбивањето на Блер да отфрли каква било вмешаност во кризата ќе предизвика интриги во Британија, каде што тој останува контроверзна личност поради неговата одлука да ја одведе Велика Британија во војна во Ирак во 2003 година.