Поранешниот директор на УБК, Сашо Мијалков утре во Апелацискиот суд ќе се соочи со скопската виша јавна обвинителка Соња Симовска кој ќе го застапува предметот „Титаник 2“ и другите првостепено осудени во овој предмет. Симовска стапува на местото на Фатиме Фетаи и Гаврил Бубевски, поранешните обвинители од СЈО.

„А1он“ дознава дека наместо обвинителите кои го застапуваа предметот, Гаврил Бубевски и Фатиме Фетаи, спроти обвинетите ќе застане скопската виша јавна обвинителка, Соња Симовска, како обвинител во втор степен пред второстепениот суд.

Ова е прв предмет пред Апелација, во кој наместо обвинителите на СЈО, ќе го застапува обвинител од Вишото јавно обвинителство каде работат 10 виши јавни обвинители.

Ова следуваше по преземањето на предметите од СЈО од државното јавно Обвинителство. Тоа значи дека отсега па натаму, сите предмети за кои ќе се жалат обвинетите или Обвинителството, нема да ги застапуваат поранешните специјални јавни обвинители, туку вишите јавни обвинители. Судија известител за јавната седница за „Титаник 2“, како што пишува на веб-страницата на судот, е Тања Милева.

Kривичниот суд во Скопје во март годинава на Мијалков му пресуди три години затвор во овој предмет. Поранешниот директор на УБК, беше осуден за примање награда за противзаконско влијание, бидејќи преку лидерот на ДПА Мендух Тачи, побарал да му наложи на сопартиецот од ДИК, Бедредин Ибраими, да гласа за поништување на гласачко место во Струмица.

Лидерот на ДПА, Мндух Тачи беше осуден на три години и два месеци затвор, Бедредин Ибраими доби 4 години и 6 месеци, а членовите на ДИК, Влатко Сајковски, Сашо Срцев и Елизабета Стефановска добија по 3 години затвор.