Дојде и нивното време. Летната варијанта на роднините на лубеницата, краставицата и тиквата ја заменуваме со есенската, односно со тиквата. Овој величествен зеленчук, преполн со витамини и минерали, може да послужи како состојка во бројни јадења, пишува „Живим“.

Исто така, тиквата е еден од најпознатите извори на бета-каротен, моќен антиоксиданс кој на овој зеленчук му ги дава познатите нијанси на жолто-портокалова боја. Кога го консумираме, нашето тело го претвора бета-каротенот во витамин А и го намалува ризикот од развој на одредени видови на рак, како на белите дробови или простатата, срцеви заболувања, како и ризикот од старечка макуларна дегенерација, позната како жолта дамка на окото.

Освен тоа, оваа есенска кралица содржи витамини Ц и Е, железо, фолна киселина, омега-3 масни киселини, цинк, селен и магнезиум, а сите заедно сочинуваат важна одбрана на нашиот имунолошки систем. Таа може да го намали и крвниот притисок.

Семките може да послужат како одлична ужинка. Тие се богати со калиум, а несолените помагаат во одржување на добриот холестерол и нормалните вредности на притисокот.

Во 100 грама од оваа намирница има 26 килокалории, 6.5 грама јаглехидрати, 0.1 грам масти и 0.5 грама влакна.

Еден од многуте примери како да ги искористите придобивките од тиквата се незаобиколните мафини. Направете си свои и збогатете ги со омилените есенски зачини.

Потребни состојки:

• 65 г шеќер (или 30 г мед)
• 90 г интегрално пченично брашно
• 90 г мазно брашно
• 3 г сол
• 2 г морско оревче
• 2 г цимет
• 60 г суво грозје
• 6 г сода бикарбона
• 450 г пире од тиква
• 2 јајца
• 45 мл масло (од репка)
• 75 мл матеница

Подготовка:

Загрејте ја рерната на 180 степени. Обложете го калапот за мафини со хартија или намастете го.

Во сад измешајте ги брашното, солта, шеќерот, зачините и сода бикарбоната.

Во голем сад измешајте ги пирето од тиква, јајцата, маслото и матеницата. Матете со рачен миксер додека смесата не се изедначи.

Додајте ја сувата смеса во влажната и мешајте додека сè не се соедини.

Со лажица ставајте од тестото во подготвените калапи за мафини. Печете 25-30 минути.

Пире од тиква можете да направите така што ќе ја пресечете тиквата на половина, ќе ја издлабите и ќе ја ставите во претходно загреана рерна на 200 °C. Печете околу 20 минути додека тиквата не омекне. Потоа, тиквата изблендирајте ја со блендер или со рачен миксер.