Голема е конкуренцијата во светот на филмуваната фантазија. Постојат голем број на филмски наслови снимени според оригинални и адаптирани сценарија, но не сите од нив забележале еднакво голем успех. Сепак, се чини дека еден филм особено се истакна и го одбележа овој жанр, а тоа е „The Lord of The Rings“. Филмот важеше за револуционерен за своето време, а денес, веќе 20 години подоцна, тој сè уште претставува пример за тоа како се снимаат филмови од овој тип.

Базирани на истоимениот роман во три тома на Џ.Р.Р. Толкин, филмовите во режија на Питер Џексон, поднасловени: „The Fellowship of The Ring“ (2001), „The Two Towers“ (2002) и „The Return of The King“ (2003), ја следат авантурата на хобитот Фродо Багинс, кој живее во измислениот свет на Средната Земја. Тој и неговата Дружина добиваат задача да го уништат Единствениот прстен, а со тоа да го уништат и неговиот творец, Темниот Господар Саурон. Во одреден момент, Дружината се разделува и Фродо продолжува со неговиот верен придружник Сем и предавничкиот Голум. Во меѓувреме, Арагорн, наследник на тронот на Гондор во егзил, заедно со Леголас, Гимли, Боромир, Мери, Пипин и волшебникот Гандалф, се обединуваат за да ги спасат слободните народи на Средната Земја од силите на Саурон и да ја извојуваат војната на Прстенот со цел да го одвлечат неговото внимание. Само така Фродо би имал можност да го уништи прстенот.

По неколку неуспешни обиди да се сними филм за Толкиновиот „The Lord of The Rings“, многумина биле убедени дека приказната е „невозможна да се екранизира“,сè до моментот кога новозеландскиот режисер Питер Џексон и неговата сопруга не го завршиле сценариото и го предале на продукциската куќа New Line Cinema, за кое добиле буџет 150 милиони долари.

Првиот трејлер се појави во јануари 2001 година и вети фантастичен спектакл со змејови, чудовишта и битки, додека пак во јуни истата година, за време на Канскиот филмски фестивал, беше прикажан 26-минутен преглед на претстојниот еп. Љубителите на Толкин и неговото најзначајно дело веќе беа освоени и со нетрпение го очекуваа првиот филм од трилогијата.

As The Fellowship Of The Ring turns 20 years old, there’s never been a better time to whisk yourself away to Middle-earth once more.

Take a look back at the making of the first film in Peter Jackson’s epic LOTR trilogy with the original Empire feature: https://t.co/7wmXSwEFUO pic.twitter.com/kRKYNOqe4H

— Empire Magazine (@empiremagazine) December 10, 2021

Оваа година, „The Fellowship of The Ring“ слави 20 години

На 10 декември 2001 година, првиот филм на трилогијата ја имаше својата Лондонска, додека пак светската премиера се случи на денешен ден, на 19 декември 2001 година. Филмот тогаш заработи 897 милиони долари.

Една година подоцна, вториот дел „The Two Towers“, заработи 947 милиони долари на кино благајните, додека пак „The Return of The King“ заработи уште 1,15 милијарди долари во 2003 година.

Според Box Office Mojo, само четири филма зарабоотиле повеќе од третиот филм на „The Lord of The Rings“, а тоа се „The Lion King“, „Jurassic park“, „Star Wars Episode I“ и „Titanic“.

Дваесет години подоцна, филмовите „The Lord of The Rings“ на Питер Џексон сè уште доминираат во доменот на кинематографската фантазија, благодарение на квалитетниот изворен материјал, големината и амбицијата на проектот, совршените локации за снимање, вниманието на деталите, масивните воени сцени, практичните и специјалните ефекти и совршениот кастинг кој ги вклучува Елајџа Вуд, Иан Меккелен, Лив Тајлер, Виго Мортенсен, Шон Астин, Кејт Бланшет, Џон Рис-Дејвис, Кристофер Ли, Били Бојд, Доминик Монаган, Орландо Блум, Хуго Вивинг, Енди Серкис и Шон Бин.

Со 30 номинации за Оскар и вкупно 17 осовени статуетки, трилогијата е најуспешната во историјата на филмот и до ден денешен претставува инспирација за други фантастични филмови и серии, каде се вбројува и една од најпопуларните тв серии, „Game of Thrones“, и поттик за развој на туризмот во Нов Зеланд, меѓу другото.