По седумдневна спасувачка мисија во турскиот град Адијаман, специјализираниот тим од ТППЕ Тетово синоќа пристигна дома.

Патот беше тешок, се вративме уморени, но и со слики во глава, со кои ќе живееме подолг период.

Наоѓавме жртви, претежно мајки во прегратки со своите деца кои се обидувале да ги заштитат од силниот земјотрес, раскажува Командирот на Тетовската противппожарна единицата Авни Амети.

Акциите се спасување беа тешки, оти целиот град со околу 200 000 луѓе е разурнат, дел од зградите се странично урнати и рушевините директни паднати над луѓето, па шансите за преживеани се многу мали.

Нивниот тим за спасување во вакви катастрофи заедно со струмичкиот и Дирекцијата за заштита и спасување шест часа биле ангажирани за извлекување на жена од една урната зграда.

Најрпвин рушевините се остранувале со багер, на почеток не ни знаеле дека под купиштата бетон и железо има жив човек.

„Најпрвин копавме со багер, но во еден момент слушнавме глас и престанавме да работиме со багер. И од тој момент дури по 6 часа ја извадивме жената. Првите зборови и беа: што се случи, дали вчера се случи земјотресот, а земјотресот се случи пред 5 дена. Таа ги бараше децата и сопругот, но тие починале, таа беше блиску до нив, ама не успеа да ги види, за жал беа починати. Ретки се ваквите случаи да спасиш некого, зградата беше падната настрана и рушевините беа паднати над луѓето, тешко некој во тој случај да остане жив, како жената остана жива, господ што се вели и помогна. Луѓето цело време околу нас со солзи и незвесност се молеа да ги извлечеме луѓето, беше хаос“, вели командирот на ТППЕ Тетово Авни Амети.

Месното население добро не прифати. Ангажирани бевме 24 часа, малку се одмаравме во шатори. Пожарникарите се хумани, ги ризикувавме нашите животи, за да спасиме туѓи животи, вели Авни.

„Таму немаше кај да се спие, се знае дека одиш во ризични зони. Работевме 24 часа, по два часа се одмаравме во шатори. Дирекцијата за заштита и спасување, комуницираа со турската амбасада. Од Општина Тетово ни се јавуваа не прашуваа за нашата безбедност. Имам еден апел, институциите да се фокусираат на што повеќе специјализирани тимови, оти нашата држава е ризична, односно спаѓа во ризични подрачја кога станува збор за земјотреси. Државата навистина треба да инвестира во оваа област“, вели командирот Амети.

Специјализираниот тим на ТППЕ Тетово беше во градот Адијаман близу до границата со Сирија.

„Тие згради кои не ги урна земјотресот треба да се срамнат со земја оти немаше ниту една зграда што остана неоштетена или се урнати или се држат што се вели на стаклени нозе, тој град треба да урне цел и да се изгради нов, вели Амети.