Здружението на граѓани со високо натпросечна интелигенција Менса Македонија в сабота, 25 ноември организира тестирање на општата интелигенција со цел прием на нови членови во Штип.

Тестирањето ќе се одржи на Факултетот за информатика при Универзитетот „Гоце Делчев“ во 12 часот.

Кандидатите со навршени 16 години што сакаат да го дознаат својот коефициент на интелигенција и не се тестирале во изминатите шест месеци, можат да се пријават на следниот линк, со уплатени 500 денари за стандардизираните тестови за интелигенција на Mensa International. Пријавувањето е најдоцна до 24 ноември.

На самото тестирање, кандидатите треба да понесат документ за лична идентификација.

Тестирањето трае 20 минути, а резултатите се доставуваат тајно, на секој кандидат посебно. Се користи ФРТ тестот за општа интелигенција, а долната граница за влез во Менса Македонија е коефициент од 131.

Менса Македонија постои од 4 декември 1999 година и има повеќе од 100 редовни члена. Од илјадниците тестирани, во горните 2 отсто од светското население се квалификувале околу 900 лица.

Менса има три основни цели: да ја одреди и промовира човековата интелигенција за доброто на човештвото, да поттикне истражувања за прородата, карактеристиките и употребата на интелигенцијата и да промовира стимулативни интелектуални и социјални можности за своите членови.