Еден од најдобрите плејмејкери што ги изнедри српската кошарка, Милош Теодосиќ, би можел да стави крај на својата блескава кариера по завршувањето на оваа сезона, пренесува Спортски журнал.

Според нивните информации, 38-годишниот ас веќе има понуди за ангажман во управните структури на Црвена звезда, клубот каде што ја започна својата професионална приказна. Наводно, раководството му понудило високи функции – директорска позиција, па дури и потпретседателско место.

Теодосиќ зад себе има богата и респектабилна кариера, покрај дресот на Звезда, настапуваше и за некои од најголемите клубови во Европа и НБА: Олимпијакос, ЦСКА Москва, ЛА Клиперс и Виртус Болоња. Со нив освои бројни титули, вклучувајќи ја и посакуваната Евролига. Ќе остане запаметен како магионичар на паркетот, играч со извонредна визија.

Црвено-белите, во моментов, се во жестока битка во полуфиналето на АБА лигата против Будуќност. Серијата ќе добие епилог во мајсторката што ќе се одигра во Подгорица.