Во тек е истрага за инцидент кој се случил на 17 декември во ресторанот „Ribs & Burgers“ во Саут Моранг, Австралија. Три мажи кои дошле со поголема група, нападнале еден маж и му нанеле полесни повреди и избегале од локалот, пренесува дневникот Еџ. Нападнатиот човек има грчко потекло, а поминал со помали повреди на лицето и напукнат прст.

Како што објавија локалните медиуми, напаѓачите и жртвата претходно биле на седницата на советот на околниот град Витлси, каде што бил најавен и протест. Ова следело откако градоначалничката на Витлси, Емилија Лиза Стерјова објавила фотографија на Фејсбук на која таа танцувала држејќи знаме со сонцето на Вергина. Набрзо, градоначалничката ја избришала објавата. Грчката заедница од локалната власт побарала во спорот да се вклучи и австралиското министерство за надворешни работи, но барањето било одбиено.

За инцидентот во ресторанот, сведоците потврдиле дека три мажи го удирале човекот со грчко потекло во главата и лицето околу 40 секунди и дека оштетен е и автомобилот на нападнатиот. За напаѓачите се претпоставува дека имаат македонско потекло и сè уште не се уапсени, а полицијата ги истражува снимките од безбедносните камери на ресторанот.