Кинеските онлајн продавници „Тему“ и „Шејн“ најавија дека од 25 април ќе ги зголемат цените на производите по воведувањето на американските царини.

Тие ги повикаа потрошувачите да ја искористат можноста и дотогаш да купуваат по актуелните цени.

„Поради неодамнешните промени во правилата и тарифите во глобалната трговија, нашите оперативни трошоци се зголемија. За да продолжиме да ги нудиме производите што ги сакате без компромис за квалитетот, ќе бидеме принудени да ги прилагодиме цените од 25 април“, се вели во соопштението на кинеските компании.

„Шејн“ и „Тему“ нудат производи од играчки до паметни телефони.

Нивниот бизнис модел е под закана по неодамнешната наредба потпишана од американскиот претседател Доналд Трамп за затворање на „трговската дупка“ што дозволуваше пакетите поевтини од 800 долари да влезат во САД без царина од Кина и Хонг Конг.

Наредбата стапува на сила на 2 мај.