На 39 години поранешниот француски репрезентативец, Франк Рибери донесе одлука да стави крај на кариерата.

Иако имаше договор со Салернитана до следното лето, Рибери одлучи да престане со професионалното играње фудбал. Како што објави италијанскиот новинар, Џанлука Ди Марцио поради повредите и здравствените проблеми, Рибери сфатил дека е време да каже крај.

Поранешниот играч на Баерн во новата сезона одигра само 36 минути, пред повторно да се повреди. Рибери е вистински великан во светскиот фудбал, играше за многу тимови, а најдлабока трага остави во Баерн Минхен. Во Минхен ги освои сите можни трофеи, има дури девет титули шампион на Германија, а во 2013 година го подигна трофејот во Лигата на шампионите.

Истата година беше и светски шампион со Германија, со Франција играше финале на Светското првенство во 2006 година, но немаше среќа да стигне до трофејот. Последните години од кариерата Рибери ги помина во Италија, играјќи за Фиорентина и Салернитана, а настапуваше уште за Марсеј, Галатасарај, Мец, Брест и Алес.

За сениорската селекција на Франција на 81 натпревар постигна 16 погодоци. Освен по своите фудбалски квалитети Рибери беше препознатлив и по големата лузна на своето лице, за која неодамна и јавно зборуваше.

„Сите освен моите родители го коментираа мојот физички изглед од висина. Се чувствував како да сум осуден, бев многу млад, никогаш не пуштив солза, но многу патев“, зборуваше Рибери.

Познато е и дека родителите го оставиле во дом кога имал само две години.

„Родителите ме оставија додека бев бебе, но за среќа за брзо пронајдов семејство кое од самиот почеток ми пренесуваше голема љубов и поврзаност која некој друг се одлучил да ми ја скрати“, гласеше само една од болните реченици кои го опишуваат животот на Франк Рибери.