Предметот „Таргет-Тврдина“ е распределен кај судскиот совет кој го води судијата Илија Трпков затоа што претходните судии не се веќе во судскиот оддел за гонење организиран криминал, информираа за Телма од скопскиот кривичниот суд.

Оттаму потврдиле дека до нив е пристигната одлуката на Апелациониот суд за поништување на првостепената пресуда за случајот во кој за злоупотреба со нелегално прислушување и масовно прекршување на човекови права се обвинети поранешниот директор на Управата за безбедност и контраразузнавање Сашо Мијалков, поранешната министерка Гордана Јанкуловска, како и поранешни вработени во УБК и МВР.

Трпков ги водел предметите „Организатори на 27-ми април“ во кој беше обвинет Трајко Вељановски како собраниски претседател, „Плацеви на Водно“ во кој беа обвинети Орце Камчев и Сашо Мијалков…

Апелациониот суд најави дека анонимизираната одлука, решение за поништување на пресудата ќе биде објавено на веб страницата на судот, што досега не се случи. За предметот „Таргет-тврдина“, Судски совет минатата недела утврди дека судијата-известител ги пречекорил сите временски рокови за одлучување со што целиот предмет е во опасност да застари.