Болната поротничка која веќе втор месец закрепнува од операција го одложи денешниот несуден старт на предметот на Специјалното јавно обвинителство, познат како „Талир“.

Овој процес никако да започне и со месеци само се одлага од разни причини. Почетокот беше во февруари, а со денешното одложување за 12 септември, вкупното одложување на стартот на судењето е седум месеци.

Во предметот „Талир“ обвинети се Никола Груевски, Кирил Божиновски и Миле Јанакиески. Тие се обвинети за злоупотреба на службената положба и овластувања и за перење пари. Исто така обвинети се и Илија Димовски и Леко Ристоски обвинети само за делото перење пари. За истото дело, како правен субјект со обвинението е опфатена и партијата ВМРО-ДПМНЕ.

Според обвинението, тие незаконски добиле најмалку 4,6 милиони евра за партијата, а потоа организирале парите да бидат уплатени на жиро-сметката на партијата преку уплатници на различни луѓе.

СЈО и го презентираше на јавноста предметот „Талир“ на 22 мај 2017 година. На прес конференцијата обвинителката Фатиме Фетаи рече дека се работи за незаконско финансирање на ВМРО-ДПМНЕ и за основано сомневање дека првоосомничениот, претседателот на партијата, во период од 2009 до 2015 овозможил финансирање на партијата спротивно на законските одредби.

– Има основано сомневање дека првоосомничениот прифатил пари и со помош на другите осомничени лица овозможил акумулирање на финансиски капитал за потребите на партијата преку перење пари. Во случајов станува збор за злоупотреба на службената потреба и овластување. Има основано сомневање дека парите потекнуваат од сторено кривичното дело сторено од група лица што преку месните организации на партијата овозможиле перење пари, со внесување пари на партиската сметка преку готовински уплати како лични уплати.

Од 2009 до 2015 на овој начин уплатени биле 301.531.662 денари (4,9 милиони евра). Дел од осомничените овие пари во завршните сметки ги прикажувале како донации. Парите биле трошени за трошоци за маркетинг, за плаќање сметки, за купување недвижен имот. Од 2009 до 2015 биле склучени 71 договор за купување недвижен имот, платен од овие незаконски стекнати пари. Дел од имотот не бил во функција на остварување на целите на партијата и не се користи за партиски цели, без партиски обележја. 11 лица сториле кривично дело перење пари, од кои 9 лица биле директни извршители, а двајца биле помагачи – рече тогаш Фетаи.