Тајван денеска го заврши првото морско тестирање за својата прва подморница развиена во земјата, што е голем чекор во проектот насочен кон одвраќање од кинеската морнарица и заштита на виталните морски патишта во случај на војна, пренесува Ројтерс.

Тајван ја направи програмата за домашни подморници клучен дел од амбициозниот проект за модернизација на своите вооружени сили, додека Пекинг одржува речиси секојдневни воени вежби за да го потврди својот суверенитет.

Програмата за подморници се потпира на експертиза и технологија од неколку земји, вклучувајќи ги САД и Велика Британија, што претставува пробив за дипломатски изолираниот Тајван, чија влада ги отфрла територијалните претензии на Пекинг.

Тајванската компанија ЦСБЦ Корп, која ја предводи изградбата на она што евентуално е планирано да биде осум подморници, во соопштението наведува дека првиот брод, наречен „Нарвал“, го завршил својот прв тест на море, тестирајќи системи, вклучувајќи погон, вентилација и радар.

„ЦСБЦ ќе продолжи да прави прилагодувања и подобрувања на системите врз основа на резултатите од тестовите“, се вели во соопштението, прикажувајќи слики од подморницата што плови над водата крај јужното тајванско пристаниште Каохсиунг.

„Нарвал“ првично требала да биде испорачана минатата година, придружувајќи се на двете постоечки подморници купени од Холандија во 1980-тите, но програмата беше погодена од одложувања.

Тајван изјави дека се надева дека ќе распореди најмалку две вакви подморници развиени дома до 2027 година, а евентуално и ќе ги опреми подоцнежните модели со ракети.

Првата подморница, со цена од 49,36 милијарди тајландски долари (1,67 милијарди американски долари), ќе користи борбен систем од „Локид Мартин Корп“, и ќе носи тешки торпеда Марк 48 произведени во САД.

Вооружените сили на Тајван се заостанати во споредба со оние на Кина, која има два оперативни носачи на авиони и подморници со балистички ракети и развива невидливи борбени авиони.

Тајван ја модернизира својата војска за да може да води „асиметрично војување“, користејќи мобилни и агилни системи како подморници, беспилотни летала и ракети монтирани на камиони за да се одбрани од својот многу поголем противник Кина.