Лидерот на ДПА, Мендух Тачи, синоќа во гостување на ТВ21 изјави дека жали што се приклучил на Европскиот фронт и го обвини лидерот на ДУИ, Али Ахмети, дека не го исполнил дадениот збор.

Тој посочи дека влегол во Европскиот фронт бидејќи сакал да биде конзистентен.

– Зашто јас сум таков, кога ќе се договорам, останувам до крај на договорот. И мислам дека мажите и жените, кои не остануваат до крај на договорот, се нечесни – рече Тачи.

Прашан кој не си го одржал зборот, Тачи го впери прстот кон Ахмети.

– Првиот, господинот Ахмети. Затоа што ние во принцип се договоривме да создадеме Фронт – рече лидерот на ДПА.

Тачи смета дека Ахмети ќе доживее катастрофа на следните избори.

– Моето почитување кон сегашниот премиер доаѓа од многу други работи, бидејќи тој е лидер на партија, тој убедливо ги доби изборите и немам ништо против него. Но, моето почитување доаѓа и од друга причина, што (Мицкоски) не го измами Алиу како што го измами Груевски. Бидејќи Алиу посегна по Никола Груевски, а Груевски ја забоде ДПА, заедно со Али Ахмети – рече Тачи.

Тој се закани дека ако уште еднаш биде прозван, ќе каже како ДУИ го молела Мицкоски за да влезе во Владата.

– Вечерва ќе одам до тука. Ако отворат уста за уште еден збор на следниот јавен настап, ќе кажам колку пати го молеа Мицкоски. Кој, со имиња и презимиња, бизнисмени од Скопје, луѓе од Албанија колку се поклониле, како се согласиле да влезат дури и без претседател на Парламентот – рече Тачи.