Светските медиуми јавуваат за трагедијата во Кочани
Светските агенции ја пренесоа веста дека рано утринава во пожар во ноќен клуб во Кочани животот го загубија над 50 млади лица. Агенциите и медиумите се повикуваат на официјални податоци од Министерството за внатрешни работи и на податоци на релевантни македонски медиуми
Препорачано
„Би-би-си“, повикувајќи се на македонското МВР, јави дека „51 лице загина во пожар во ноќен клуб во Северна македонија, а повеќе од 100 се повредени“. Британскиот јавен сервис пишува дека пожарот избувнал околу 3 часот наутро „за време на настапот на бендот „ДНК“, хип-хоп дуо популарно во земјата, а местото на одржување сè уште горело неколку часа подоцна“. На концертот, пишува „Би-би-си“, присуствувале дури 1.500 луѓе.
Германската агеција ДПА засега само кусо ја пренесува веста на МИА дека во пожарот во ноќниот клуб во Кочани има најмалку 50 загинати.
Американската „Асошиејтед прес“ го цитира министерот за внатрешни работи Панче Тошковски, кој пред новинарите во Кочани изјави дека во пожарот има 51 загинато лице и уште десетици повредени, чии роднини се собрани пред болниците, барајќи информации за нивните блиски.
И франциската агенција АФП јавува дека „најмалку 50 загинати во пожар во ноќен клуб во Северна Македонија“. Агенцијата објави дека пожарот избувнал во „Пулс“, ноќен клуб во гратчето со околу 30.000 жители.
За трагедија во Кочани утринава интензивно известуваат и регионалните медиуми – хрватска Хина, српските агенции Бета и Танјуг, бугарска БТА, црногорска Мина…
